D'un gallent qui bailla à une dame trente beaux escus faulx pour coucher avec elle et comment le fait fut avéré et fallut à la dame dire la vérité.

N'a pas longtemps que à Paris y avoit la femme d'ung conseiller de la court, belle, jeune femme, fresche et deliberée, bien disposte de son corps et qui ne refusoit jamais raison, quant on luy presentoit. Or y avoit il ung jeune gallent, bien amoureux d'elle, et qui scavoit bien de quel mestier estoit la dame, car il avoit ouy dire à d'autres de ses compaignons du gouvernement de la dame. Si se tira par devers elle, luy suppliant qu'elle luy fit quelque gracieuseté. Mais jamais la dame, qui faisoit de l'estroite, ne s'y vouloit consentir, et au fort  aller, après plusieurs devises entre eux deux, pour toute conclusion elle luy dit, qu'il ne coucheroit point avec elle, s'il ne lui bailloit XXX escus, pour avoir une robbe d'escarlate. Le compagnon […]