Quant Ulespiegle vint de Mariedale à Mollen, il devint malade et vint héberger sus ung apoticaire, pour illecques prendre des medecines, et l'apoticaire estoit ung peu merveilleux et donna à Ulespiegle une forte purgation. Au matin, la purgation commença à besoigner, et Ulespiegle se leva et ne sçavoit où demourer à tout le fardeau. Si trouva la maison partout fermée et il alla en l'ouvroir et print douze boites, en lesquelles  avoit de la sirope et aultres medecines, et chia en toutes les boites disant: Hors des boites sont sorties toutes les medecines, par quoy il convient derechief les y mettre, et ainsi l'apoticaire ne perdra riens […]