BLASON DE L’ANEAU.

Je n'oseroys, après tant bons espritz
Mettre en avant mes imperfectz escriptz
Pour blasonner quelque membre ou partie
Du femenin ; ma force est amortye,
La main me tremble, et mon œil devient lousche,
L'aureille sourde, et muette la bouche,
Délibérans le cueur destituer,
Si à cela se veut esvertuer.

Tant seullement, pour le commencement,
M’essaieray à louer l'ornement
Le plus petit, mais le plus précieux,
Joignant de près au corps tant gracieux
De ma maîtresse. O gentil anelet !
Aneau d'or fin, en forme rondelet,
Sur qui l’orfèvre a mainct jour travaillé.
Aneau bien faict et trop myeulx esmaillé,
Et enrichy de perle orientalle,
D'une turquoyse, esmeraulde royalle,
D'ung dyamant, d'ung rubiz desiré,
D'une esmalite, ou saphir azuré,
Venuz de loing, voire de-là la mer.

Aneau qui es ferme lien d'aimer,
Aneau tesmoing de la foy conjugalle,
Aneau jadiz  vraye enseigne royalle,
Cercle petit envyronnant le doy
De celle là à qui ma vie doy.
Heureux aneau, que pour laver la main,
La dame mect souvent dedans son sein,
Que ne m'est-il octroyé une chose,
Que de mon corps se fist métamorphose
En ta figure, affin de fréquenter
Où ne me puis que, de loing, présenter !

Aneau, tu as privilége et franchise
Du corps toucher si près que la chemise,
Et bien souvent sans penser mallefice,
D'aller taster la dure et ronde cuisse,
Le blanc tetin, l'estomac et le ventre,
Et approcher de ce beau corps le centre,
Où gist l'espoir des amans affligez.

Aneau meilleur que celui de Gigés ;
Par lequel eut sa dame tant aimée,
Aneau de prix, méritant renommée,
Plus que les sept forgez par Hyarcas.
L'on m'entendroit si je comptois le cas,
Mais tu m'entends, tu sçais bien mon vouloir,
El celle là qui tant m'a faict douloir,
Lisant cecy dira que j'ay raison
De m'efforcer à faire ton blason.